الموبايل القوى جدا على عكس التوقعات و اللى رغم ان سعره قليل الا ان سامسونج بتقدم فيه مواصفات هايلة جدا زى الشاشة الفوق الممتازة و البطارية و غيرهم
المواصفات الكاملة و السعر موجودين هنا بس دلوقتى هنتكلم عن تجربة استخدام الموبايل اللى أكيد بتفرق عن الكلام اللى على الورق

الموبايل ده لما هتطلعه من العلبة هتكتشف ان كاميرته الخلفية التانية بزاوية تصوير Wide مش كاميرا منظر و بس زى ما كتير من المواقع قالت



بس مبدأيا سامسونج هنلاقى انها عملت حركة غريبة و هيا ان الموبايل مش جاى بأى طبقة حماية أو أى جراب و بما ان ضهر الموبايل بالكامل من البلاستيك سهل الخدش يبقى لازم تشترى جراب و Screen Protector للموبايل
و ضهر الموبايل بيكون عاكس بالكامل زى المراية معا فريم بلاستيكى بنفس لون الموبايل
و كمان لما تشوف الموبايل هتاخد بالك من ميزات تانية كتير زى منفذ الشحن الجديد Type C و طبعا الشاشة الخرافية
بس خلينا نتكلم عنهم بالتفصيل ونبدأ بالشاشة اللى هتكون Super Amoled و ديه طبعا مفاجأة فى موبايل فى الفئة السعرية ديه انه يكون فيه شاشة بالجودة ديه
الشاشة بتكون 6.4 انش بدقة +HD و فعلا هيا أحلى شاشة فى الفئة السعرية دي حتى و ان كان فيه بدائل بدقة أعلى بس السوبر أموليد ليها سحرها بالألوان و جودة التفاصيل و لكن العيب العجيب فى الموبايل ده ان مفيش خاصية Always On Display رغم ان نوع الشاشة المفروض انه بيدعم الخاصية ديه و كمان مفيش لمبة اشعارات يعنى لما يوصلك اشعار و الموبايل مش فى ايدك مش هتعرف ان فيه خبر أو حاجة جديدة غير بالصدفة البحتة

سوفت وير الموبايل هوا Android 9.0 Pie بواجهة سامسونج الجديدة الكاملة بكل اضافاتها زى عمل نسختين من برامج التواصل الاجتماعى و المجلد المخفى و تشغيل تطبيق داخل تطبيق و المسح على مستشعر البصمة من تحت لفوق علشان تنزل ستارة الاشعارات
و كمان خاصية ال Dolpy Atmos اللى بتحسن الصوت من خلال السماعة السلكية 

أما المعالج فهو معالج جديد Exynos 7884 ثمانى الأنوية بتقنية تصنيع 14 نانو ميتر و طبعا الأداء هيكون كويس جدا سواء فى تصفح البرامج و الحفاظ عليهم فى الرام أو التقليب من برنامج للتانى بكل سهولة



كمان أداء الألعاب ممتاز جدا و لعبة زى Pubg هتشتغل بسهولة على الاعدادات المتوسطة للجرافيكس و لو عايز تشغلها على الاعدادات العالية برضه هتشتغل بس هيكون فيه تسقيط فى الفريمات

نروح للكاميرات و هنلاقى ان الكاميرا الخلفية مزدوجة كاميرا أساسية 13 ميجا بيكسل بفتحة عدسة F1.9 و ديه هتطلع صور كويسة من ناحية الألوان فقط أما التفاصيل فهتكون قليلة  ده هيظهر أكتر لما تعمل زووم
تظبيط ال Dynamic Range مش بيكون كويس و لو الاضاءة مش منتظمة هتلاقى الصورة فيها أماكن مفرقعة و أماكن فيها مضلمة تماما
أما الكاميرا التانية هيا 5 ميجا بيكسل Wide و ديه طبعا كاميرا مفيدة جدا و لازم كل الشركات تضيفها فى أجهزتها و ده لأنها بتنفع فى تصوير عدد أشخاص كبير أو علشان تجيب تفاصيل أكتر

أما الكاميرا السيلفى فهيا 8 ميجا بيكسل و بصراحة هيا أقل كاميرا فى كل الفئة السعرية من حيث التفاصيل و بتحتاج اضاءة ممتازة علشان تطلع صور يدوب مقبولة أما فى الاضاءة الضعيفة هيكون وجودها زى عدمها
الموبايل لا يدعم خاصية تصوير ال Slow Motion و لكن المميز فى الكاميرات سواء الخلفية أو الأمامية وجود خاصية العزل يعنى تقدر تاخد صور بورتريه فى الحالتين

المستشعرات الموجودة فى الموبايل هيا مستشعر المقاربة بتاع المكالمات و لكن بيكون سوفت وير مش هارد وير و بالنسبة لمستشعر ضبط سطوع الشاشة الأوتوماتيكى فهو مش موجود فعليا لكن استبدلوه بطريقة خايبة و هيا ان كل شوية الكاميرا السيلفى بتلقط صورة للاضاءة المحيطة وتعدل سطوع الاضاءة على أساسها و لكنها بصراحة فكرة فاشلة و هتضطر انك تعتمد على تغيير السطوع اليدوى
كمان الموبايل بيدعم مستشعر البصمة و بيشتغل بكفاءة و بسرعة لكن ما بيعملش اهتزاز لما بتحط صباعك عليه و ديه حاجة غريبة
أخر مستشعر هو الجايروسكوب اللى بيخليك تشغل نضارات الواقع الأفتراضى

البطارية فبتيجى بسعة ممتازة 4000 ميللى أمبير و بتكمل لحد 8 أو 9 ساعات من وقت استخدام الشاشة و كمان الموبايل داعم للشحن السريع بقدرة 15W و بيشحن بالكامل فى أقل من ساعة ونص
و منفذ الشحن بيكون USB Type C